درايش : مصروف «الضيافة»!!

كل هذا صارفينه ل "الضيافه"؟!

ليش يا ابن الناس عازم كم ضيف؟!

كم صحن حطّيت للضيف ب كلافه؟!

وكم سكن سكّنت في قصرٍ منيف؟!

لو على حسابك فلا قلنا حسافه

يا ربيع الضيف في موسم خريف!

ويا منادي للريجيم و للنحافه

ليش هذا "البند" عندك مو نحيف؟

يدبل البوقات و"القيمه المضافه"

إللي ما خاف العقوبه وشاف سيف

لا حسيب ولا رقيب بيوم شافه

وحتى لو شافه فلا شيٍ مخيف!

كلها يومين تاليها بلطافه

العقوبه تصير: "توبيخٍ عنيف"!

وكم بوقه غيرها تقطع مسافه

وتختفي كالطير بس نسمع رفيف

لين صار البوق له طابع جلافه

ما هو بالآلاف والوزن الخفيف

ولين صرنا نشك في معنى النظافه

چِن ماكو في دوايرنا شريف!