درايش : نبي قدوة!

مشكله عندك طوابيرٍ طويله

بس ما تلقى الذي يصلح مثال

فيهم اللي عايش الدنيا ب حِيله

يچذب وعنده الچذب كبْر الجبال

وفيهم اللي يستغل كتف "القبيله"

وإن صعَد يطوي معه كل الحبال

"ليبرالي الليل" وأفكاره أصيله

وفي القبيله الصبح ينسى "الليبرال"!

وفيهم الديِّن ويدعو للفضيله

بس ظلْم المختلف عنّه... حلال!

وفيهم اللي "الطائفه" عنده وسيله

وإن هَدَينا... يحرث الفتنه ب جِدال

وفيهم "القلّاب" كل موجٍ يشيله

وكل دارٍ دار إن جادت ب مال

الوطن مركب، يدوّر عن بديله

لا اكْفَختنا الريح واهبوب الشمال

وفيهم اللي للدوَل فارش شليله

حتّى لو عظْمين مَد إيده وشال

المبادئ -كالحيا- صارت قليله

وصارت "القِدْوات" في الديره خيال!