"فِلْس" في الديره انتشر، جداً خطير

كالوباء يزيد كل يوم انتشار

Ad

ما يخلي لا موظف لا مدير

لا كبار، وما عتَق ناسٍ صغار

والغريب إنّه وصَل حتى الفقير

مزمن العلّه أبو امراضٍ كثار

وإن بدا... مبداه يضرب في الضمير

يتْلفه، ويصير حالك بانحدار

تنقلب كاللوح لو مهما يصير

ما تحس في شي لو حولك دمار

وأول أعراض المرض شيٍ صغير:

تحلم بجمع الذهب ليل ونهار

ومنظر "الدينار" في عيونك مثير

منشغل تعبان في وجهك صُفار

ما تحلّل ما تحرّم، لك هدير

كل "مال الدار" في جيوبك اندار

وتشتغل تبرير بالفصل الأخير:

ليش بِد الناس من حولي حصار

مال سايب والبلد متروس خير

ومحّد يحاسب إذا المحصول طار

الصغير يبوق مو بس الكبير

طامعٍ مسعور في عيونه شرار

راح منهو يستحي ورابي بخير

من يصيبه "فِلْس" ما يحْسب لعار

حتى إيراد"الطوابع" صار غير

افطنوا له وفرّغوا بنده أصفار

ما اتركوا في الدار لو غلّة شعير

مثل فيران احفرت ساس الجدار

"فِلْس" ماله طب "فايروسه" حقير

لو "وزارة صحتك" تاخذ قرار

والعجيبه شفْت بالصحه وزير

صابه "فِلْس" وما لقوا له أي عقار!!
وضّاح