إمساكية لكل الشهور

أمسكوا بعد السحور، وأمسكوا بعد الفطور

ماهو بس "إمساك معده" في شهر من كل سنه

أمسكوا عن چذب فايض تنترس منه الجدور

أمسكوا عن غش خافي وإدعاء المَسْكنه

طافحه صحون الأوادم... بس ما فيها سرور

وخاليه صحون الضماير عكس ذيچ المُعْلَنه

أمسكوا عن غش/ نصب/ ومَدّة الإيد الجسور

في جيوب الدار وإلاّ في رشاوي مبطّنه

أمسكوا عن طبع خايس في الشوارع والمرور

في "البعارين الحديد" تطوف زحمه مُزمنه

ما يصير... شلون صايم وانت ما وقّفت دور

"إمسك" الفوضى اللي فيك وخل طبع المصبنه

"إمسك" أعصابك وشرّك واللي في صدرك يفور

"إمسك" الحقد اللي صاير فيك مثل المطحنه

جوهر "الإمساك" فكره... لا تطوّلها... وتدور

نترك أحيان المعاني والسبب في العنعنه:

منْع لذّاتك بجسمك يعني تهذيب الشعور

يعني تكبح طول يومك كل نزوه مخَزَّنه