درايش / الكتابة في زمن الكورونا: حلّاق لأيام العمر

يا بوك إحلق لي الشعر واترك الشيب

ولا تعجّب من بياضه يا سلطان

الشيب... دورات الزمن في دواليب

والقص... قَص الشوك عن ورد الأغصان

وانت الذي زرعٍ جنيته من الطيب

من أُمْ منْبَتْها بختري وريحان

وهذا الزمن كلّه زمان التعاجيب

ركَّب على السنجاب يا بوك جنحان

متساويه بين الذي يجهل العيب

وذاك الذي عنده على الطيب نيشان

واللي مشى حدْر السقوف المحاديب

واللي رفَض كل ماقفٍ فيه حقران

الحر عنده للفرايس مخاليب

وما ينزل لجيفه ولو كان جوعان

والحر ما دنّق يلم الدغاليب

بعض الغرور يفيد في بعض الأحيان

للطيب ربيتك وفعلك كما الذيب

مكسب ورفعة راس في دور الأزمان

قِص الشَعر يا شوق سيد الرعابيب

يفداك من بيته انكتَب دون عنوان

جرِّب براس آبوك من دون تدريب

ترى الشَعر... رزنامة الوقت بألوان

وخَل أبيض الشيبات مثل المشاهيب

تجاربٍ مرّت زماني الذي كان

الكون يفنى ما كتبنا المكاتيب

والوقت قَص أعمار والزُود نقصان