الله بالنور: والله بلشة!
![د. ناجي سعود الزيد](https://www.aljarida.com/uploads/authors/24_1666205156.jpg)
وبعدين يقولون غسيل أموال بمليارات! ويقولون واحد هدّ الديرة وانحاش.هذي غير سالفة، وأنا شكو بهالسوالف، وما أدري ليش الأمريكان مشغلين محاكمهم وتحرياتهم بسرعة؟! ما يدرون أن إحنا بالكويت غسالاتنا وصابونّا يمحي أي آثار لأي أوساخ... حتى آثار الجرائم يقضي عليها...عندنا أحدث وأفضل غسالات والصابون والمعقمات، خصوصاً هالأيام، شغالة 24 ساعة خايفين من الكورونا، بعد هالدور غسيل مليارات، لا يبه محنا حولكم موليّهْ وكل اللي نبيه كفاف اللغى!عسى بنوكنا تفتح عادي (مو إلكتروني) علشان نشوف بعينّا أن حساباتنا بأمان، وماراح ندخل البنك إلا بكمامات ودسوس، وحتى لو تبون نتسلف ملابس الأطباء والممرضين الواقية وأقنعة جراحة... هم ما عندنا مانع، بس علشان نتأكد أن فليساتنا ما انغسلت وانشفت واحنا ما ندري!ما يندرى كل شي جايز بهالديرة ولاّ نسيتوا فلوس التأمينات؟!