درايش : رسومات في دفتر الطفولة

(1)

بعد درسك بالدفاتر عن "حمد ماسِك قلَم"

جرِّب ارسم لي عَلَم

باختلاف ألوان عندك: أبيض/ أسود/ أخضر/ أحمر

انت فكرك واجتهادك

شنهو اللون اللي تقدر ما تخلّي له مساحه لما ترسم هالعلَم؟!

(2)

بعد درسك بالدفاتر عن "حمد قَط القلم"

راح يركض بالصحاري هاوي ويربّي غنَم

وفي خيالك:

ذيب أسحم لابِد بجنح الليالي

والغنم وسْط المرابع تابعه راعي الغنم

منهو أخطر يا "السَلَم":

ذيب في الظلمه يخاتل وإلا راعي في الصحاري وإلا تفكير القطيع الغافل اللي ما فهَم

أو حمد لمّا تنازل - في البدايه- عن قلَم؟!

(3)

بعد درسك بالدفاتر، بعد أسوار المدارس، بعد مشوار بحياتك:

شنهو صح اللي تشوفه:

ال (لا) لمّا يدفعونك للمتاهات البعيده

أو بدون إقناع تختار ال (نَعَم)؟

انت فكرك واختيارك

بس لا تضيّع شموسك في دروبك لمّا تشتدّ الليالي

وإلّا تسْهى وإلّا تنسى وإلّا تضعف يا "السَلَم".