درايش: اختلاف

إخْذ الذي يعنيك من بين الأوراق

واترك قصايد ما تطابق لك الذوق

ما احنا نِسَخ كربون بأفكار وأشواق

حتى التوائم بينها الطبع مفروق

خلّك بضفّه، نهرها دوم رقراق

ما كدّرك هاجس ولا نبض محروق

سلطه وحكومه بيدها خير وأرزاق

واللي يأيّدها من الخير مرزوق

دنّق وعدّد كم فضيله بالأعناق

ومن بعد هذا لا تطالع أبد فوق

وأحيان لا مطمع ولا خوف واشفاق

واللي لحقته ما درى بيوم ملحوق

بس طينتك تبّاع ما تطلق الساق

وعند انطلاق الروح تشكي من العوق

كلٍّ ورايه باختلافات ووفاق

ولا جبرتك تاخذ بكل منطوق

ولولا اختلاف الناس ما بين الأذواق

ما بارت السلعه وردّت من السوق!

وضّاح