درايش : إذا المذمّة من واحد ناقص

إن كان من عاداك تافه ودجّال

أو "مرتزق" ماله خلايق تصونه

فالذم مثل المدح في بعض الأحوال

والعيب في ذاك الذي يمدحونه

تعْرف مكان الشخص في المنزل العال

إذا الردايا شفتهم يكرهونه

واللي يعيب إن القمر يرجع هلال

خَلّه لعلّه ما تشافى طعونه

حنّا من القمرا لنا راحة البال

وهُم من سواد الليل: قلبه ولونه

وكم طامعٍ منهم ولو يعقد احبال

بأول مهاوي السفْح عزمه يخونه

امحرّمه العليا على هذي الأشكال

اللي رُبوا ما بين ذل ومهونه

ومن يعشق اللولو تجشّم للأهوال

واللي يهاب الموج خابت ظنونه

والحر باني ماكره بروس الأجبال

ويشوفهم مثل النمل في عيونه

ووالله لو يرمون بسهام وأنبال

خابت مساعيهم ولا يوصلونه

● وضّاح