درايش: خميس عقاب

بعض الأسامي عُود كل ما عتَج طاب

واليا انذكَر اسمه اختلط مِسْك بالطيب

نوّاب لو غابوا... عن الناس نوّاب

ونوّاب بين الناس... في صفحة الغيب

وذاك الزمن ما ينّسي في السما عقاب

في فزعة الديره يسِنّ المخاليب

راعي مواقف ما رسمها على كتاب

بس في ضمير الناس نَقْش الكتاتيب

راهي ولا همّه أبد يوم أو هاب

له " بوصله" ماكو عليها معازيب

رايه براسه يسحبه وين ما جاب

وما ورّده إلّا موارد هل الطيب

يا كاتب التاريخ من ضمن كتّاب

وقّف ترى الصفحات تحتاج ترتيب

البعض زاهد ما يبي ضو وإعجاب

لو خادم الديره بسموم ولواهيب

ويقول لو قلبه كتم لوم وعتاب:

ماني ب متْفضِّل ولكن مواجيب

أجيال كانت تستحي افعال تنعاب

واليوم جيل من اللحى قابل العيب

أجيال كانت روس ما تقبل أذناب

واليوم جيل أذناب يرسم ألاعيب

واكتب " خميس عقاب" ذاك الزمن ناب

اللي حمى الدستور عن هجمة الذيب

إكتب وفصّل بالمعاني والأسباب

تلقاه ساكن ذاكرتنا ولا يغيب

وضّاح