درايش: النيباري... الموقف والكلمة

تمر الكواكب، والكواكب بنات أيام

ولا يبقى في هذي المجرّه... سوى كِلْمه

سناها عمر نجمه، وقمر مستدير وتامّ

على الجاهل بْجهله، وعلى العالِم وعِلْمه

وعلى الصادح برايه، وعلى الحرْف والأقلام

وعلى العادل بأمره، وعلى الظالم وظُلْمه

حسافه إذا ما تكتمل في الوطن أحلام

وعزيزٍ يودّعنا... وعينه على حِلْمه

معلّم يعلّمنا " الطليعه" مدى أعوام

رحَل ما انحنى لو يوم في حربه وسِلْمه

يمر الرصاص وما على باله استسلام

رقيق الحواشي سيف ما فيه أي ثَلْمه

غياب الأسامي صار لوحة قَدَر رسّام

وشريط الأحبّه دار في بَكْرتَه وفِلْمه

خسرنا منارات بْبلدنا... بعَشْر أيام

ودَخَلْنا زمن ما يتّسِع صدره وحِلْمه

يغيب المسافر فيك، چِنّه بْضُلُوعك نام

وتدري الحواجز طين ما تقدر اتْكَلْمه

وضّاح