درايش: في الورد شوك

يا طلعة الصبح النِدِي الضحوكه

ياللي بعز الصيف في قلبك اغيوم

يا ليت منهو مرتقي في سلوكه

مثلك، فلا يجاور سوى أقمار وانجوم

ومثلك حياته طول عمره امحبوكه

لا جامل المخطي ولا رافق ارخوم

لا شك حولك من رمى لك اشبوكه

وطبع الغدر بالوجه واضح وموسوم

لا تنتظر من لاش تصْدق اصكوكه

حتى ولو شفت الورق يوم مختوم

الورد يخفي بين الأغصان شوكه

وفي الروض - لو شفته نضر- ورد مسموم

قلبك فَطِن ما يوم خابت اشكوكه

في من ضُمَر في خاطره حقد مكتوم

وشيٍّ خفيٍّ لك عدوّك يحوكه

إن ما عرفته اليوم تب تعْرِفه يوم

وضرْب الأسد غَفْله وكَسْرة اوروكه

القصد منها يشوف جرحه ولا يقوم

وضّاح